Махсус имкониятлар
Айтиш керакки, аксарият фуқароларимиз карантин чораларининг юмшатилганини “касаллик тугади” деб, нотўғри қабул қилишмоқда. Баъзилар карантин чекловлари юмшатилганлигидан фойдаланиб, бепарволикка берилаётганини ҳам кўришимиз мумкин. Оқибатда аҳоли орасида касаллик юқтирганлар яна кўпайиши мумкинлигини ўйлаб ҳам кўришгани йўқ десак, хато бўлмайди.
Шуларни инобатга олган ҳолда Самарқанд туманида тарғибот тадбирлари ўтказилмоқда. Хусусан, санитария-эпидемиология осойишталик ва жамоат саломатлиги хизмати туман бўлими ҳамда тиббиёт ходимлари билан ҳамкорликда аҳоли орасида карантин қоидаларига риоя қилишини, тиббий ниқоб таққан ҳолда юриши фуқароларга тушунтирилди.
- Хўжа Аҳрори Вали, Ўрташиқ маҳаллаларида ўтказилган тадбир доирасида айрим фуқароларнинг карантин қоидаларига риоя қилмасдан жамоат жойларида юрганига гувоҳ бўлдик, - дейди Самарқанд туман санитария-эпидемиология осойишталик ва жамоат саломатлиги хизмати бўлим бошлиғи Ғулом Собиров. – Тиббий ниқоб тақмасдан юрган фуқароларга огоҳлантиришлар берилди. Албатта, ҳар бир фуқаронинг карантин қоидаларига риоя қилиши, тиббий ниқобдан доимий фойдаланиши аввало, ўзининг саломатлиги учун хизмат қилади.
Бу каби тадбирлар давом этади.
